អូរថ្មរូងស្ថិតនៅក្នុងភូមិព្រៃប្រសិទ្ធិ៍ ឃុំបាក់រទេះ ស្រុក កំពង់សិលា ខេត្តកោះកុង នៅក្បែរចំណុចប្រសព្វរវាងខេត្តកោះកុង និងខេត្តកំពង់ស្ពឺ ។ បើយើងធ្វើដំណើរចេញពីភ្នំពេញលើកំណាត់ផ្ទះជាតិលេខ ៤ ឆ្ពោះទៅទីក្រុងព្រះសីហនុដល់គីឡូម៉ែត្រលេខ ១១៨ ដែលហួសពីចំណោតយាយម៉ៅពេជ្រនិលបានប្រមាណ ១២ គីឡូម៉ែត្រ រួចក្រឡេកមើលខាងស្តាំដៃ យើងនឹងបានឃើញ ផ្លូវលំក្រាលក្រួសក្រហមមួយហើយបន្តដំណើរលើកំណាត់ផ្លូវនោះ ៦ គីឡូម៉ែត្រនឹងបានទៅដល់ អូរថ្មរូង ។
នៅអមសងខាងរមណីយដ្ឋានអូរថ្មរូងមានលក្ខណៈពិសេស និង ល្អខុសប្លែកពីរមណីយដ្ឋានផ្សេងៗដោយសារ តែនៅអមសងខាងអូរមានភ្នំខ្ពស់ទាបៗដែលមានព្រៃ និង វល្លិ៍ធ្លាក់សំយាកទៅក្នុងអូរដែលធ្វើឱ្យអ្នកទេសចរដែលចុះទៅ ងូតទឹកលេងមានសភាពសប្បាយរីករាយ ជាមួយនឹងធម្មជាតិ ។ រឹតតែពិសេសជាងនេះទៅទៀត នៅគ្រប់ទីកន្លែងនៃ បាតអូរមានដុំថ្មតូចធំយ៉ាងច្រើនមានខ្លះងើបផុតពីផ្ទៃទឹកអាចឱ្យភ្ញៀវអង្គុយលេងយ៉ាងសប្បាយរីករាយឯដុំថ្មខ្លះ បាននៅបំប្រះទឹកដែលភ្ញៀវអាចឈរនៅលើដុំថ្មប៉ប្រះទឹកនោះ មើលពីចម្ងាយទៅហាក់ដូចជា គេមានសិល្ប៍វេទមន្ត អាចដំណើរលើទឹកបាន ។
ក្រៅពីមើលខ្សែទឹកហូររត់គេចវាងជាមួយនឹងផ្ទាំងថ្មដែលងើបផុតពីផ្ទៃទឹកនោះ ភ្ញៀវអាចស្តាប់សំឡេងទឹកធ្លាក់ លាន់រំពឹងព្រៃលាយឡំជាមួយនឹងសំឡេងសត្វបក្សីយំយ៉ាងរំពងព្រៃផងនោះបានបង្កើតជាតន្ត្រីធម្មជាតិមួយយ៉ាងពីរោះ ដែលយើងពិបាកនឹងរកអ្វីមកប្រៀបប្រដូចឱ្យស័ក្តិសមណាស់ ។
រមណីយដ្ឋាន អូរថ្មរូងមានតំបន់កម្សាន្តលំហែកាយខុសៗគ្នាចំនួន ៤ ។ តំបន់ អូរថ្មរូងស្ថិតនៅដើមដំបូងគេ តំបន់នេះមានដងអូរហ៊ុមព័ទ្ធសងខាងទៅដោយភ្នំដែលមានដើមឈើ និង វល្លិវារយីងរយោងយ៉ាងក្រាស់ ។ នៅក្នុង ដងអូរមានដុំថ្មធំៗយ៉ាងច្រើនងើបផុតពីផ្ទៃទឹក តំបន់នេះ ចម្ងាយប្រវែង១.៥០០ ម៉ែត្រនឹងមានចរន្តទឹកហូរមិនសូវខ្លាំង ប៉ុន្មានឡើយ ។ តំបន់អូរថ្មរូងទីពីរលាតសន្ធឹងចម្ងាយ ១.១០០ ម៉ែត្រ ដែលមានទេសភាពមិនចាញតំបន់ទីមួយឡើយ ប៉ុន្តែតំបន់នេះមានល្បឿនទឹកហូរលឿនជាងតំបន់ទីមួយព្រោះតំបន់នេះស្ថិតនៅភាគខាងលើ ។ តំបន់ទីបីគឺជាតំបន់ ទឹកធ្លាក់ចំណុចនេះហើយដែលភ្ញៀវទេសចរទាំងឡាយ ដែលបានទៅដល់ទីនោះហើយត្រូវតែចង់ឃើញនូវទិដ្ឋភាពនៃ ទឹកធ្លាក់ពីកំពូលភ្នំខ្ពស់មកប៉ះព្រៃប្រឹក្សានិង ផ្ទាំងថ្មធំៗបែកខ្ចាយមុននឹងហូរចូលទៅដងអូរ ។ ទិដ្ឋភាព និង ទេសភាព នៅទីនេះបានធ្វើឱ្យភ្ញៀវទាំងឡាយសម្លឹងផ្តិតយករូបភាពដោយមិនអាចប៉ប្រិចភ្នែកឡើយ ។ ភ្ញៀវខ្លះនាំគ្នាទៅងូតទឹកនៅ ខាងក្រោមនៃល្បាក់ទឹកធ្លាក់យ៉ាងសប្បាយរីករាយ និង តំបន់ទីបួនគឺជាតំបន់ទេសភាពធម្មជាតិដែលស្ថិតនៅអមសងខាងអូរ ភ្ញៀវទេសចរទាំងឡាយអាចទៅអង្គុយលេងនៅតាមជម្រាលនៃជើងភ្នំ ឬក៏អ្នកខ្លះអាចអង្គុយលេងនៅលើវល្លិ៍ដែលដុះតភ្ជាប់គ្នា ពីដើមឈើមួយទៅដើមឈើមួយទៀត ។ ទេសភាពបែបនេះគេកម្រនឹងឃើញមានណាស់ នៅក្នុងប្រទេសកម្ពុជាយើងសព្វថ្ងៃនេះ ។
No comments:
Post a Comment